INGUBE Erosketa jasangarria ingurumen-sektorean: balio-katearen jasangarritasuna
Testuingurua
Ekoizpen- eta kontsumo-eredu linealen ondoriozko ingurumen-inpaktuak (lehengaiak-produktua-hondakinak) eta gero eta urriagoak diren baliabide naturalen gaineko presio gero eta handiagoa direla-eta, agintari publikoek, sektore pribatuko enpresek eta beste erakunde batzuek garapen-esparru bat ezarri nahi dute, berotegi-efektuko gasen emisioak murrizteko, baliabideen erabilera eraginkorra egiteko, hondakinen sorrera gutxitzeko eta haien kudeaketan hobekuntzak sartzeko premiei erantzungo dien ekonomia-eredu berri batean oinarrituta.
Egoera horretan, erosketa jasangarria tresna baliagarria da helburu horiek lortzeko. Erosketa jasangarria hornidura-katearen barruan baliabide materialen eta energetikoen zikloak ixten laguntzen duten produktuak edo zerbitzuak eskuratzeko prozesutzat har daiteke, eta, aldi berean, ingurumenerako ondorio negatiboak minimizatzen dira, hala nola beren bizi-zikloan hondakinak sortzeari dagokionez. Ingurumen-irizpideak integratzen ditu hornidurak erosteko eta zerbitzuak kontratatzeko erabakietan, bai sektore publikoan, bai sektore pribatuan.
Proiektuaren deskribapena
INGUBE proiektuaren helburua da erosketa jasangarria sartzea ETEetan, ingurumen-irizpideak enpresen erosketa- eta kontratazio-prozeduretan txertatuz.
Proiektuaren diseinuari esker, enpresa parte-hartzaileek honako hauek lortu ahal izango dituzte:
- Enpresa-jarduerari lotutako ingurumen-inpaktua murriztea
- Kontratazio-ikuspegi berriak lortzea, prozesuak erakundearen ingurumen-balioekin lerrokatuta
- Kostuak murriztea eta ekoizpen-prozesuetan eraginkortasun handiagoa izatea
- Ingurumenari dagokionez zorrotzagoak diren merkatu berrietan estrategikoki lehiatzeko aukerak eskaintzea
- Enpresaren irudi korporatiboa hobetzea
- Produktu eta zerbitzuetan berrikuntza eta garapen teknologikoa bultzatzea, enpresak erreferentzia gisa kokatzeko
Lortu nahi diren helburuak kontuan hartuta, ondoz ondoko fase hauetan garatzen da proiektua:
1. fasea. Produktuen eta zerbitzuen kategoriak identifikatzea
2. fasea. Produktuak eta zerbitzuak hautatzeko irizpideak zehaztea
3. fasea. Hornitzaileak eta merkatua aztertzea
4. fasea. Zeharkako produktuen eta produktu espezifikoen ingurumen-irizpideak ezartzea
5. fasea. Erosketa-prozeduran irizpideak txertatzea
6. fasea. Erosketa gauzatzea
8. Ardatz estrategikoa:
Lan duina eta hazkunde ekonomikoa. Enpresa-kudeaketa bikaina bultzatzea ingurumen-sektorean
Balio-zirkuluak
12. GJHa: Ekoizpen eta kontsumo arduratsuak
Espero diren emaitzak
Proiektu honekin, enpresetan erosketa jasangarria bultzatzea espero da, parte hartzen duten enpresen jarduera hobetzeaz gain, balio-kate osoaren ingurumen-inpaktua murrizten baita, bai ibaian gora (hornitzaileak), bai ibaian behera (bezeroak). Gainera, ingurumen-irizpide horiek txertatzeak produktu-hornitzaileen eta zerbitzu-emaileen arteko lehiakortasuna ere sustatzen du, eta berrikuntza indartzen du egungo produktuen hobekuntzan eta berrien garapenean.
Enpresek fitxa batzuk jasoko dituzte hautatutako produktu eta zerbitzuen ingurumen-irizpideekin, erakundearen erosketa-prozesuaren parte direnak, eta ingurumen-aldagaia eraginkortasunez integratzeko erosketa-prozeduraren berrikuspen bat ere emango zaie.
Parte-hartzaileak
Proiektua honako ETE hauen lankidetzarekin ari da gauzatzen: Birziplastik - Ekogras - Emaús Gipuzkoa - Solve Imi - Sercontrol eta Aclima, bitarteko eragile gisa. Enpresak biltzea eta ingurumen-sektoreko enpresen lehiakortasunaren hobekuntza sustatzea dagokio.
Finantzaketa
Eusko Jaurlaritzako Ekonomiaren Garapen, Jasangarritasun eta Ingurumen Sailak finantzatzen du proiektua, Ekonomia Zirkularreko Berrikuntzarako Dirulaguntza Programaren bidez (ETE Zirkularra lerroa).
